रौतहट । रौतहटको राजपुर नगरपालिका ७ मा लागेको मेलामा ग्यास सिलिन्डर पड्किँदा एक जनाको मृत्यु भएको छ भने तीन जना घाइते भएका छन् । बेलुनमा हावा भर्दै गर्दा सिलिन्डर विस्फोट भएको थियो ।
वडा नम्बर ८ निमुवा अकोलवाका ३८ वर्षीय दिनानाथ महतो, जो मेलामा बेलुनको व्यापार गर्दै थिए, बुधबार अपराह्न अचानक सिलिन्डर पड्किएर गम्भीर घाइते भएका हुन् ।
उनको शरीरको धेरै भाग जलेको थियो, र उनलाई प्रादेशिक अस्पताल गौरमा प्राथमिक उपचारपछि वीरगन्ज लैजाने क्रममा बाटोमै मृत्यु भएको जिल्ला प्रहरी कार्यालयका प्रवक्ता डिएसपी दीपक कुमार रायले जानकारी दिए ।
घटनामा अन्य तीन जना, १० वर्षीया अन्जली कुमार साह, ५० वर्षीया नायना देवी र ७ वर्षीय विशाल साह घाइते भएका छन् । उनीहरूको प्रादेशिक अस्पताल गौरमा उपचार भइरहेको छ । मृतक दिनानाथको शव पोस्टमार्टमका लागि प्रादेशिक अस्पताल गौरमा राखिएको छ ।
