भक्तपुरः भक्तपुरको सूर्यविनायकमा बोलेरोले ठक्कर दिँदा एक युवकको मृत्यु भएको छ।
मृत्यु हुनेमा गोरखा नगरपालिका घर भई भक्तपुर सूर्यविनायक नगरपालिका- ९ नलिन्चोक बस्ने ३८ वर्षका कमल बयलकोटी रहेका प्रहरीले जनाएको छ।
मंगलबार साँझ साँगाबाट काठमाडौँ आउँदै गरेको ना ५ ख २३६१ नम्बरको बोलेरोले बयलकोटीलाई ठक्कर दिएको जिल्ला प्रहरी परिसर भक्तपुरले जनाएको छ।
तीव्र गतिमा रहेको बोलेरोले ठक्कर दिँदा बयलकोटी गम्भीर घाइते भएका थिए। उनलाई उपचारका लागि भक्तपुरकै डा. इवामुरा अस्पताल लगिएको थियो।
त्यहाँबाट थप उपचारका लागि मंगलबार राति नै ललितपुरको सुमेरु अस्पताल लगिएको थियो। त्यहीँ उनको मृत्यु भएको प्रहरीले जनाएको छ।
ठक्कर दिने बोलेरो चालक सर्लाही लालबन्दी नगरपालिका १६ का २३ वर्षीय सागर माझी रहेका र उनलाई नियन्त्रणमा लिइएको प्रहरी वृत्त जगातीले बताएको छ। घटनाबारे थप अनुसन्धान भइरहेको जनाइएको छ।
