सर्लाही । सरकारले ‘बिचौलिया’को संज्ञा दिँदै कार्यालय प्रवेशमा रोक लगाएको भन्दै भूसेवा प्रयोगकर्ता र कानुनी लेखापढी व्यवसायीहरू आन्दोलनमा उत्रिएका छन् । सर्लाहीको हरिवनमा मालपोत र नापी कार्यालय व्यवसायीहरूले सेवा ठप्प पारेका हुन् ।
आफूहरूलाई सरकारले विनाकारण बिचौलिया भनेर अपमान गरेको र कार्यालय हाताभित्र प्रवेश निषेध गराएको भन्दै हरिवनका सम्पूर्ण लेखापढी व्यवसायीहरू आन्दोलनमा उत्रिएका छन् ।
उनीहरूले ‘हामी बिचौलिया होइनौँ’ भन्दै आफ्ना सटरहरू पूर्ण रूपमा बन्द गरेर विरोध जनाएका छन्। व्यवसायीहरूले काम रोकेपछि जग्गा प्रशासनसँग सम्बन्धित मालपोत र नापी कार्यालयका सम्पूर्ण कामकाज प्रभावित भएका छन्।
स्थानीय लेखापढी व्यवसायी कृष्ण भण्डारी लेखापढी व्यवसायीलाई कार्यालय प्रवेशमा रोक लगाउनु अन्यायपूर्ण भएको बताउँछन् । ‘हामी कानुनबमोजिम काम गर्ने व्यवसायीलाई सरकारले बिचौलियाको ट्याग लगाएर कार्यालय प्रवेशमा रोक लगाउनु अन्यायपूर्ण छ। यसैको विरोध स्वरूप हामीले आफ्ना सटर बन्द गरी आन्दोलन गर्न बाध्य भएका हौँ’ उनले भने ।
व्यवसायीहरूले सटर बन्द गरी सेवा प्रवाह ठप्प पारेपछि जग्गा किनबेच, रोक्का, फुकुवालगायतका कामका लागि मालपोत र नापी कार्यालय आएका सर्वसाधारण भने मर्कामा परेका छन्। आफूहरूको सम्मानजनक उपस्थिति र सहज वातावरण नबनेसम्म आन्दोलन जारी रहने व्यवसायीहरूको अडान छ ।
