लालबन्दी : दुर्घटनामा मोटरसाइकल चालकको मृत्यु गराएर फरार भएका एक ट्रक चालकलाई हरिवन प्रहरीले पक्राउ गरेको छ।
हिजो जेठ २२ गते मंगलबार हरिवन नगरपालिका वडा नम्बर १० सुखेपोखरीमा ट्रकको ठक्करबाट बागमती नगरपालिका-२ बस्ने २० वर्षीय युवकको मृत्यु भएको थियो। दुर्घटना गराउने उक्त ट्रकका चालक २६ वर्षीय सोलिन्द्र कुमार कुशवाहलाई आज बिहान प्रहरीले पक्राउ गरेको जनाएको हो।
२६ वर्षीय कुशवाहलाई इलाका प्रहरी कार्यालय केशरगञ्जको समन्वयमा बयलबासबाट पक्राउ गरिएको प्रहरीले जनाएको छ।
ईश्वरपुर नगरपालिका वडा नम्बर १३ घर भएका कुशवाहलाई बयलबास बजारमा हिँडिरहेको अवस्थामा प्रहरीले नियन्त्रणमा लिन सफल भएको थियो।
हिजो सुखेपोखरीमा पश्चिमबाट पूर्व गइरहेको ना६ख ४९८९ नम्बरको ट्रकले बागमतीका २० वर्षीय मोटरसाइकल चालक दीपशरण चालिसेलाई ठक्कर दिएको थियो। घटनास्थलमै चालिसेको मृत्यु भएपछि कुशवाह फरार भएका थिए।
कुशवाहलाई प्रहरीले खोजतलास गर्दै जाने क्रममा ईश्वरपुर नगरपालिका वडा नम्बर ६ बयलबास बजारमा हिँडिरहेको अवस्थामा आज बिहान साढे ६ बजे फेला पारेको जनाएको हो।
पक्राउ परेका कुशवाहमाथि र घटनाबारे थप अनुसन्धान भइरहेको पनि प्रहरीले जनाएको छ।
