महोत्तरी । महोत्तरी जिल्लामा अत्यधिक गर्मीका कारण विद्यार्थीहरूको स्वास्थ्यमा पर्न सक्ने प्रतिकूल असरलाई मध्यनजर गर्दै गौशाला नगरपालिकाले नगर क्षेत्रभित्रका सबै विद्यालयमा पठनपाठन बन्द गर्ने निर्णय गरेको छ। यसअघि बर्दिबास नगरपालिकाले पनि गर्मीका कारण विद्यालय बन्द गर्ने निर्णय गरिसकेको थियो।
गौशाला नगरपालिकाका प्रमुख प्रशासकीय अधिकृत ओमबहादुर अधिकारीले बिहीबार जारी गरेको सूचनाअनुसार लगातार बढ्दो गर्मीले जनजीवन प्रभावित हुनुका साथै विद्यालयमा अध्ययनरत विद्यार्थीहरूको स्वास्थ्य, सुरक्षा तथा हितलाई ध्यानमा राख्दै शुक्रबारदेखि सोमबारसम्म नगरभित्रका सबै सामुदायिक, संस्थागत तथा धार्मिक विद्यालयमा पठनपाठन पूर्ण रूपमा बन्द रहनेछ।
यसअघि, बुधबार नै महोत्तरीकै बर्दिबास नगर कार्यपालिकाको कार्यालयले नगर क्षेत्रका सबै विद्यालय दुई दिनका लागि बन्द गर्ने निर्णय गरेको थियो। गर्मीको लहर बढ्दै जाँदा विद्यार्थीहरूलाई विद्यालय आउजाउ गर्न र कक्षाकोठामा बस्न असहज भएको गुनासो बढेपछि स्थानीय सरकारहरूले यो कदम चालेका हुन्।
शिक्षा अधिकारीहरूका अनुसार, यो बिदाले विद्यार्थीहरूलाई केही राहत मिल्ने र उनीहरूको स्वास्थ्य सुरक्षा सुनिश्चित गर्न मद्दत पुग्ने अपेक्षा गरिएको छ।
