लालबन्दी : प्रहरीले सर्लाहीको लालबन्दी नगरपालिका-१४ बाट १६ क्विन्टलभन्दा बढी गाँजा बरामद गरेको छ।
घरमा लुकाएर राखेको अवस्थामा फेला प्रहरीले गाँजा बरामद गरेको हो।
लालबन्दी नगरपालिका–१४ डाइनी खोलाभन्दा माथि लंगुरडाँडाँस्थित दुई वटा दुईतले घरमा १६ वटा ड्रम तथा प्लास्टिकका बोरामा लुकाएर राखेको अवस्थामा १६ क्विन्टल १२ किलो ८ सय ५० ग्राम गाँजा बुधबार राति बरामद गरिएको थियो।
प्रहरीले विभिन्न किसिमका ड्रमहरू, बोराहरू र गाँजा च्याप्ने मेसिनसमेत बरामद गरेको जनाएको छ।
बरामद गरिएको गाँजा बिहीबार इलाका प्रहरी कार्यालय लालबन्दीमा पत्रकार सम्मेलन गरी सार्वजनिक गरिएको छ।
गोप्य सूचनाका आधारमा जिल्ला प्रहरी कार्यालय र सशस्त्र प्रहरी १० नम्बर गणको थप टोली पुगेर गाँजा बरामद गरेको प्रहरी उपरीक्षक रवीन्द्रबहादुर सिंहले जानकारी दिए।
