लालबन्दी : मकवानपुरको सिस्नेरीमा खसेको पहिरोमा परी ज्यान गुमाएका एन्फा एकेडेमीका ६ प्रशिक्षार्थी विद्यार्थीमध्ये एक हुन् सर्लाही लालबन्दी-१७ का १३ वर्षीय आदित्य बलम्पाकी। एकेडेमीबाट शनिबार बिहान सुरक्षित स्थानतर्फ लैजाने क्रममा आदित्यसहित ६ जनालाई पहिरोले बगाएको थियो।
पहिरोले बगाएका ६ जनाको शव फेला परेको छ। उनीहरूको शव काठमाडौंस्थित शिक्षण अस्पताल लगिएको छ।
पहिरोमा परी ज्यान गुमाउनेमा लालबन्दीका आदित्यसहित निजगढका बिकल रेग्मी, मकवानपुरका अनुप घलान, साइमन योञ्जन, दिवस बानियाँ र काठमाडौंका रियान्स आचार्य रहेका छन्।
एन्फा प्रवक्ता सुरेश शाहले सिस्नेरी एकेडेमीमा रहेका ६ खेलाडी पहिरोमा परेको पुष्टि गरेका छन्। इन्द्रसरोवर गाउँपालिका-४, स्थित बात्सल्यदेवी माध्यमिक विद्यालयमा एन्फाले सञ्चालन गरेको आवासीय एकेडेमीबाट प्रशिक्षार्थी खेलाडीलाई सुरक्षित स्थानमा लैजाने क्रममा उनीहरूलाई पहिरोले बगाएको थियो।
सुरक्षित स्थानमा लगिएका ३० प्रशिक्षार्थीलाई भने काठमाडौं लगिएको छ। उद्धार गरिएका ३४ मध्ये ३० जनालाई नेपाली सेनाको हेलिकोप्टरबाट काठमाडौं लगिएको हो।
यु–१३ उमेर समूहमा आदित्यसहित पाँच प्रशिक्षार्थीले सिस्नेरीस्थित एन्फा एकेडेमीमा फुटबल प्रशिक्षण गरिरहेका थिए। अन्य चार जना भने सुरक्षित छन्। उनीहरू गत जेठदेखि सिस्नेरीमा थिए।
लालबन्दी-१७ रानीगन्जका आदित्य फुटबल खेल्न औधी रुचाउथे। फुटबलमा भएको रुचिकै कारण उनले लालबन्दीबाट एकेडेमीसम्मको यात्रा तय गरेका थिए। जिल्ला र प्रदेशको छनौट पार गर्दै एकेडेमीमा पुग्न सफल आदित्य फुटबलमा आफ्नो भविष्य बनाउन चाहन्थे।
