लालबन्दी : सर्लाहीको बागमतीमा मोटरसाइकल दुर्घटना हुँदा २ वर्षीया बालिकाको मृत्यु भएको छ।
नगरपालिकाको वडा नम्बर ५ केराबारीस्थित सडकमा आइतबार दिउँसो बा२९प ९५९८ नम्बरको मोटरसाइकल अनियन्त्रित भई दुर्घटना भएको थियो। उक्त दुर्घटनामा सोही नगरपालिका ४ बस्ने मोटरसाइकल चालक सोम बहादुर डिङडुङकी २ वर्षीया छोरी कृष्टिना डिङडुङको मृत्यु भएको हो।
दुर्घटनामा गम्भीर घाइते भएकी कृष्टिनालाई गाउँमैत्री अस्पताल लालबन्दी ल्याएको तर उपचारको क्रममा मृत्यु भएको प्रहरीले जनाएको छ।
यसैगरी वीरगञ्ज महानगरपालिका १४ गण्डकस्थित सडकमा परवानीपुरबाट गण्डकतर्फ जाँदै गरेको मधेश प्रदेश ०३ ०२७ प ८०९३ नम्बरको स्कुटरको ठक्करबाट पैदलयात्री सोही महानगरपालिका १८ सुखचैन बस्ने ३५ वर्षीया गीता देवीको मृत्यु भएको छ।
आइतबार दिउँसो स्कुटरले ठक्कर दिँदा गम्भीर घाइते भएकी उनको बयोधा हस्पिटल गण्डकमा उपचारको क्रममा गएराति मृत्यु भएको हो।
