धनुषा : सर्लाहीबाट जन्ती लिएर हिँडेको बस धनुषामा दुर्घटना हुँदा घाइते हुनेहरूको संख्या १५ पुगेको छ।
सर्लाहीबाट जन्ती लिएर लहान जाँदै गरेको बसले पैदलयात्रीलाई जोगाउन खोज्दा पल्टिएको थियो। धनुषाको गणेशमान चारनाथ नगरपालिका ८ पोर्ताहामा आइतबार राति ९ बजे ना४ ख ४४९२ नम्बरको बस दुर्घटना भएको थियो।
दुर्घटनामा घाइते हुनेहरूमा सर्लाहीको कौडेना गाउँपालिका-६ का ६० वर्षीय जयन्दर राय, ३२ वर्षीय मनोज कुमार यादव, ५४ वर्षीय ससुखन यादव, वीरेन्द्र रायका ७ वर्षीय छोरा निगम राय, ६५ वर्षीय केबट बैठा रहेका छन्।
यस्तै सर्लाही विष्णुपुर गाउँपालिका-८ का ३७ वर्षीय राधेश्याम प्रसाद यादव, ६० वर्षीय टेकन राय, ६५ वर्षीय दीप नारायण यादव, ६२ वर्षीय बिन्देश्वर राय, ७० वर्षीय लाल बाबु राय, २८ वर्षीय विजय कुमार साह रहेका प्रहरीले जनाएको छ।
त्यसैगरी ६० वर्षीय जगदीश राय, ६० वर्षीय कपिलेश्वर राय पनि घाइते भएका छन्। घाइतेमध्ये प्रायःको अवस्था सामान्य रहेको छ भने जयन्दर रायको अवस्था मध्यम रहेको छ।
उनीहरू सबैको उपचार धनुषास्थित गोदारमा रहेको रिया पोलिक्लिनिकमा उपचार भइरहेको प्रहरीले जनाएको छ।
दुर्घटनापश्चात् फरार भएका बसका चालक भने अझै सम्पर्कविहीन रहेका धनुषा प्रहरीले जानकारी दिएको छ।
