गौर : नारायणगढ–मुग्लिन सडकखण्डमा पहिरोले दुई वटा बस बगाएको छ।
शुक्रबार बिहान करिब साढे ३ बजे तिर चितवनको भरतपुर महानगरपालिका वडा नम्बर २९ सिमलताल भन्ने स्थानमा पहिरोले दुई वटा बस बगाएको हो।
विरगन्जबाट काठमाडौं आउँदै गरेको यात्रुवाहक बस बगाएको जिल्ला प्रहरी कार्यालयका डीएसपी भेषराज रिजालले जानकारी दिए । प्रहरीका अनुसार बसमा २२ यात्रु सवार थिए ।
त्यस्तै काठमाडौंबाट गौर जाँदै गरेको गणपति डिलक्स लेखेको बस पनि पहिरोले बगाएको प्रहरीले जनाएको छ । सो बसमा ४२ यात्रु रहेको अनुमान छ ।
बस बगाएको खबर लगत्तै ठूलो संख्यामा सुरक्षाकर्मी परिचालन गरिएको छ । पहिरोले बगाएका दुईवटै बस त्रिशूली नदीमा बेपत्ता भएको रिजालले जानकारी दिए।
पहिरोको कारण राजमार्गको दुईतर्फी आवागमन रोकिएको छ । हराएका दुवै बस भेटिएको छैन । सुरक्षाकर्मीको टोलीले हराएको बस खोजी गरिरहे पनि खोजी गर्न समस्या भएको छ ।
दुवै बसमा गरेर ६० जनाभन्दा बढी यात्रु रहेका बताइएको छ।
