बरहथवा: सर्लाहीको बागमती नगरपालिका–१२ बथनीयाकी ५० वर्षीया कृष्णकुमारी कुशवार केही दिनयता पढ्न जान थालेकी छन्।
६ वर्षीया नातिनी पढ्दै गरेको विद्यालयले ‘नातिनीका लागि तपाईंले पनि पढ्नुपर्छ’ भनेपछि उनमा पनि पढ्ने जाँगर चलेको हो।
पढ्ने उमेरमा विभिन्न समस्याका कारण विद्यालय पढ्न नपाएकाले आफूले अक्षरसमेत चिन्ने मौका नपाएको कृष्णकुमारी बताउँछिन्। ‘आफूले नपढेर दुःख पाएँ’, उनले भनिन्, ‘छोराछोरी पनि पढ्न मानेनन्, उनीहरूले अहिले दुःख पाउँदैछन्। नातिनातिनालाई पढाउँछु भनेको तर आफूले पनि पढ्नैपर्ने रहेछ। नातिनीलाई गृहकार्य सिकाउन जानिन्छ कि भनेर पनि पढ्न सुरु गरेकी हुँ’, उनले भनिन्।
कृष्णकुमारी जस्तै २३ वर्षीया रीता माझी पनि अचेल छोरीसँगै पढ्न जान थालेकी छन्। घरमा पढेलेखेको व्यक्ति नहुँदा छोरीलाई पढाउन समस्या भएकाले आफैले पढ्न थालेको उनले बताइन्।
उमेर छँदै पढ्न नसकेकामा रीतालाई पछुतो छ। अब छोरीलाई उच्च शिक्षा पढाउने उनको रहर छ। नपढेकै कारण छोरीको गृहकार्य गराउन पनि नसकेको उनी बताउँछिन्। थोरै सिकाउने, उनीहरूले के पढिरहेका छन्, भनेर बुझ्न, उनीहरूले नजानेको कुरा सिकाउन पनि विद्यालय जान थालेको रीताले बताइन्।
विपन्न सुकुम्बासी परिवारको बसोबास रहेको यस क्षेत्रका अधिकांश नागरिक निरक्षर छन्। कृष्णकुमारी र रीताजस्तै १५ अभिभावकलाई बागमती नगरपालिका–१२, बथनीयास्थित जनजागृति प्राथमिक विद्यालयले पढाउन सुरु गरेको हो।
बालबालिकाको शैक्षिक गुणस्तर सुधारका लागि पहिला अभिभावक शिक्षित बनाउनुपर्ने देखिएपछि अभिभावक शिक्षा सुरु गरिएको विद्यालयका प्रधानाध्यापक हेरम्भराज सुवेदीले जानकारी दिए।
‘निकै प्रयासपछि पनि साना कक्षाका बालबालिकाको पढाइमा सुधार नभएपछि अभिभावकलाई पढाउन थालेका हौँ’, उनले भने, ‘अभिभावक निरक्षर हुँदा बालबालिकाले गृहकार्य नै नगर्ने, घरमा नपढ्ने, स्कुल पनि नियमित नपठाउने भएकाले पहिला अभिभावकलाई पढाइको महत्व बुझ्ने र बालबालिकालाई गृहकार्य गराउन सक्ने बनाउन खोजेका हौँ।’
विद्यालयको पहलमा सुरु भएको ‘नानीसँगै हामी’ कार्यक्रमका लागि लुम (तान) नामक गैह्रसरकारी संस्थाले आर्थिक सहयोग गरेको विद्यालयले जनाएको छ।
विद्यालयका अनुसार सहभागी आमा (अभिभावक) हरूलाई ५० दिनसम्म अनौपचारिक शिक्षा प्रदान गरिनेछ।
यसमा सहभागीले सामान्य लेखपढदेखि बालबालिकाको पालनपोषण, सरसफाइलगायत ज्ञान प्राप्त गर्न सक्नेछन्। योसँगै महिला स्वास्थ्य, शिक्षा, अधिकारलगायत विभिन्न विषयमासमेत प्रशिक्षण प्रदान गरिनेछ।
पहिलो चरणमा १५ अभिभावकलाई समेटे पनि पछि अन्यलाई पनि सहभागी गराउने योजना रहेको विद्यालयले जनाएको छ।
रासस
