काठमाडौँ : बाराको सुवर्ण गाउँपालिका-१ चरमोहनामा प्रदेश २-०३००त ३८५४ नम्बरको ट्याक्टरबाट लडेर सोही ठाउँ बस्ने अजय सिंहको छोरा ४ वर्षीय साजन कुमार सिंहको शुक्रबार दिउँसो मृत्यु भएको छ।
अजयले साजनलाई ट्याक्टरमा बसाई इँटा लोड गरी एक ठाउँबाट अर्को ठाउँमा सार्दै गर्दा ट्याक्टरबाट लडेका उनलाई ट्याक्टरको चक्काले कुल्चिदाँ घटनास्थलमै मृत्यु भएको हो।
यसैगरी सप्तरी हनुमाननगर कंकालिनी नगरपालिका-१ स्थित सडकमा बा२६ प ६४०१ नम्बरको मोटरसाइकल प्र१-०२-००३ ह ३५२१ नम्बरको सिटी रिक्सामा ठक्कर खाई शुक्रबार दिउँसो दुर्घटना हुँदा मोटरसाइकल चालक सोही नगरपालिका-१ भारदह बस्ने २१ वर्षीय लक्ष्मन मण्डलको मृत्यु भएको छ।
दुर्घटनामा गम्भीर घाइते भएका उनको बीपी कोइराला स्वास्थ्य विज्ञान प्रतिष्ठान घोपा धरानमा उपचारका क्रममा मृत्यु भएको हो। साथै दुर्घटनामा घाइते भएका मोटरसाइकलमा सवार १ जना र सिटी रिक्साका चालकको भारदह अस्पतालमा उपचार भइरहेको छ।
दुर्घटनाका सम्बन्धमा प्रहरीले आवश्यक अनुसन्धान गरिरहेको जनाएको छ।
