लालबन्दी : पूर्वपश्चिम राजमार्गअन्तर्गत सर्लाहीको बाँके जंगलमा आज बिहान यात्रुवाहक बस दुर्घटना हुँदा पाँच जना घाइते भएका छन्।
काठमाडौँबाट धरानका लागि छुटेको प्रदेश १–०२–००१ ख ९७३७ नम्बरको बस अनियन्त्रित भई बाँके खोलाको पुल र सङ्ग्रामपुरतर्फ जाने बाटोमा दुर्घटना भएको हो।
दुर्घटनामा घाइते भएका पाँच जनामध्ये एकको अवस्था मध्यम रहेको इलाका प्रहरी कार्यालय केशरगन्ज सर्लाहीले जानकारी दिएको छ। घाइते उनलाई उपचारका लागि हरिवनस्थित नमुना अस्पतालमा लगिएको छ।
त्यस्तै २ जनालाई मोडल अस्पताल लालबन्दी लगिएको र बाँकी २ जनालाई जनकपुर लगिएको प्रहरीले जनाएको छ।
अर्को सवारीसाधनलाई साइड दिने क्रममा चिप्लिएर दुर्घटना भएको हुन सक्ने प्रहरीको अनुमान छ। बसका चालकलाई नियन्त्रणमा लिएर अनुसन्धान भइरहेको प्रहरीले जनाएको छ।
