बारा । बारा प्रहरीले जेष्ठ नागरिकबाट लुटिएको रकम सम्बन्धी घटनामा चार भारतीय नागरिकलाई पक्राउ गरेको छ । कलैया उपमहानगरपालिका १ स्थित प्रभु बैंक नजिकै असोज १ गतेको दिन ५० हजार रुपैयाँ लुटिएको थियो । उक्त रकम बैंकबाट निकालेपछि घर फर्किरहेका बलिरामपुरका एक वृद्ध व्यक्तिलाई चक्कु देखाएर लुटपाट गरिएको थियो ।
पक्राउ परेकाहरूमा बिहार राज्यको पश्चिम चम्पारण जिल्लाका ४३ वर्षीय सुरेश प्रसाद बानियाँ, ४५ वर्षीय शर्मा मुखिया, ३५ वर्षीय शैलेश तिवारी र ३४ वर्षीय रवि दास रहेका छन् । प्रहरीको भनाइ अनुसार, पक्राउ पर्ने चारै जनाले अर्को व्यक्तिलाई लुट्ने योजना बनाइरहेको बेला कलैयाबाट पक्राउ गरिएको हो ।
लुटिएका वृद्धका परिवारले दिएको उजुरीका आधारमा प्रहरीले अनुसन्धान अघि बढाएको थियो । अनुसन्धानकै क्रममा पक्राउ परेकाहरूलाई योजनाबद्ध रूपमा लुटपाटको तयारी गरिरहेका बेला पक्राउ गर्न सफल भएको प्रहरीले जानकारी दिएको छ । पक्राउ परेकाहरूको साथबाट भारतीय नम्बरको मोटरसाइकल पनि बरामद गरिएको छ र घटना सम्बन्धी थप अनुसन्धान जारी रहेको छ ।
