मलंगवाः सर्लाहीका विभिन्न स्थानमा बनाइएका घरेलु मदिरामाथि प्रहरीले एक्सन लिएको छ। जिल्लाका विभिन्न स्थानमा सञ्चालित घरेलु मदिराका भट्टीमा छापा मारेर नष्ट गरेको छ।
विष्णु गाउँपालिका र गोडैता नगरपालिकाका विभिन्न स्थानका घरेलु रक्सी बनाउने भट्टी नष्ट गरिएको जिल्ला प्रहरी कार्यालय सर्लाहीले जनाएको छ।
उक्त गाउँपालिकाको वडा नम्बर ३ का विभिन्न स्थानमा सञ्चालित अवैध मदिरा भट्टी, त्यसबाट उत्पादित तयारी मदिरा र रक्सी बनाउने कच्चा पदार्थ नष्ट गरिएको प्रहरीले जनाएको छ।
विष्णु गाउँपालिकामा घरेलु मदिरा बनाउन प्रयोग गरिने ७ सय लिटर कच्चा पदार्थसहित भाँडाकुडा नष्ट गरिएको प्रहरीले जनाएको छ। त्यस्तै गोडैताका विभिन्न स्थानमा मदिरा बनाउन प्रयोग हुने १ हजार लिटर कच्चा पदार्थका साथै ३ सय लिटर तयारी मदिरा र सामग्रीहरू नष्ट गरिएको छ।
