काठमाडौं । वैदेशिक रोजगारीका लागि विभिन्न देश पठाइदिने भन्दै रकम ठगी गरेको आरोपमा प्रहरीले दुई जनालाई पक्राउ गरेको छ ।
पक्राउ पर्नेहरूमा काठमाडौंका ४३ वर्षीय निरबहादुर कार्की र सर्लाहीका ३९ वर्षीय विजय कुमार यादव रहेका छन् ।
काठमाडौं उपत्यका अपराध अनुसन्धान कार्यालयको विशेष टोलीले उनीहरूलाई राजधानीका विभिन्न स्थानबाट पक्राउ गरेको हो ।
प्रहरीका अनुसार पक्राउ परेका निरबहादुर कार्कीले क्रोएसिया पठाउने प्रलोभन देखाई ८ जना व्यक्तिहरूलाई ठगी गरेको आरोप छ ।
त्यस्तै, विजय कुमार यादवले कतार पठाइदिन्छु भन्दै पीडितबाट २ लाख २० हजार रुपैयाँ असुल गरी ठगी गरेको उजुरी परेको थियो ।
वैदेशिक रोजगारीमा पठाइदिने भन्दै रकम लिने तर विदेश नपठाई सम्पर्कविहीन हुने गरेको सूचनाका आधारमा उनीहरूलाई नियन्त्रणमा लिइएको प्रहरीले जनाएको छ ।
पक्राउ परेका दुवै जनालाई थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको कार्यालयले जानकारी दिएको छ ।
