मलंगवा । महोत्तरीको जलेश्वर कारागारबाट फरार रहेका डाका मुद्दाका एक बन्दीलाई सर्लाही प्रहरीले पक्राउ गरेको छ । जेनजी आन्दोलनको क्रममा कारागारबाट फरार भएका ३८ वर्षीय विजेन्द्र कुमार पासवानलाई प्रहरीले नियन्त्रणमा लिएको हो ।
जिल्ला प्रहरी कार्यालय सर्लाहीका अनुसार इलाका प्रहरी कार्यालय नवलपुरबाट खटिएको प्रहरी टोलीले गोप्य सूचनाको आधारमा पासवानलाई शुक्रबार बिहान करिब ७:३० बजे पक्राउ गरेको हो ।
उनलाई लालबन्दी नगरपालिका वडा नं २, जुटपानीबाट पुनर्वास जाने भित्री सडक खण्डबाट नियन्त्रणमा लिइएको प्रहरीले जनाएको छ । पक्राउ परेका पासवान लालबन्दी नगरपालिका–२, पुनर्वास टोलका बासिन्दा हुन् ।
डाका मुद्दामा जलेश्वर कारागार महोत्तरीमा कैद भुक्तान गरिरहेका पासवान विगतको आन्दोलनका क्रममा कारागारबाट फरार भएका थिए ।
जिल्ला प्रहरी कार्यालय सर्लाहीका प्रवक्ता एवं प्रहरी नायव उपरीक्षक (डीएसपी) वेद प्रसाद गौतमका अनुसार पक्राउ परेका पासवानलाई थप अनुसन्धान तथा कारबाहीका लागि हाल इलाका प्रहरी कार्यालय लालबन्दीमा राखिएको छ।
