वीरगन्ज : जिल्ला प्रहरी कार्यालय पर्साले एकै दिन विभिन्न ठाउँमा ‘सर्च’ अभियान नै चलाएर प्रहरीले १० जनालाई पक्राउ गरेको छ।
पर्सा जिल्ला अदालतबाट भएको फैसला कार्यान्वयन गर्ने सिलसिलामा प्रहरीले चलाएको ‘फरार प्रतिवादी पक्राउ अभियान’अन्तर्गत सबै प्रतिवादीलाई पक्राउ गरिएको पर्सा प्रहरीका प्रवक्ता दीपक भारतीले बताए।
पक्राउ पर्नेहरूमा वीरगञ्ज-८ निवासी सन्ध्या देवीकानु, पर्सा नगरदाहा–८ निवासी वैद्यनाथ साह तेली, प्रमोद साह तेली, नगिना देवी साह, अमर प्रसाद, निचुटा–५ बस्ने पारस गिरी, पकाहामैनपुर–२ का खुतिनि बादर्जी, पोखरीया–१२ का रामप्रसाद महतो धानुक र मायादेवी लगायत रहेका छन्।
प्रहरीले पक्राउ गरेकाहरूमध्ये ७ जना कुटपिट मुद्दाका, २ जना जालसाजी र एक जना किर्ते मुद्दाका आरोपित रहेका जनाइएको छ। उनीहरूलाई आवश्यक कारबाहीका लागि पर्सा जिल्ला अदालतमा बुझाइएको छ।
