सर्लाही । सर्लाही प्रहरीले भारतबाट नेपालतर्फ आउँदै गरेका दुई जनालाई कटुवा पेस्तोलसहित पक्राउ गरेको छ ।
रामनगर गाउँपालिका–७ सिसौट टोलका वर्ष करिब २५ वर्षीय किशन महरालाई विशेष सूचनाका आधारमा पक्राउ गरी उनको बयानका आधारमा अर्का १८ वर्षीय श्याम महरालाई पनि नियन्त्रणमा लिइएको प्रहरीले जनाएको छ ।
प्रहरीले बागमती नदीको किनारबाट एउटा कटुवा पेस्तोल बरामद गरेको थियो । जिल्ला प्रहरी कार्यालय सर्लाहीका अनुसार भदौ ११ गते दिउँसो करिब ३ बजे भारतको सोनवर्षा तर्फबाट सर्लाहीको मलंगवा तर्फ बीआर ०६ डीएम ९५२३ नम्बरको मोटरसाइकल चढी आउँदै गरेका किशन महरालाई विशेष सूचनाका आधारमा प्रहरीले नियन्त्रणमा लिएको थियो । प्रहरी निरीक्षक रवीन्द्र कार्कीको कमान्डमा खटिएको टोलीले उनलाई पक्राउ गरेको थियो ।
सोधपुछका क्रममा किशनले आफूले बोक्ने गरेको हतियार बागमती नगरपालिका–४ जिरायत टोल बस्ने विनोद महराका छोरा वर्ष १८ वर्षीय श्याम महरालाई राख्न दिएको बताएका थिए । सोही बयानका आधारमा प्रहरीले श्याम महरालाई उनको घर ठेगानामा गई नियन्त्रणमा लिई सोधपुछ गर्दा उनले उक्त हतियार बागमती नगरपालिका–१२ स्थित बागमती नदीको बगरमा राखेको बताए ।
प्रहरीले तोकिएको स्थानबाट एक नाल कटुवा पेस्तोल बरामद गरेको जनाएको छ ।
पक्राउ परेका दुवै जनालाई बिहीबार सर्लाही जिल्ला अदालतबाट १० दिनको म्याद थप गरी हातहतियार तथा खरखजना मुद्दामा थप अनुसन्धान भइरहेको जिल्ला प्रहरी कार्यालय सर्लाहीले जनाएको छ ।
