रौतहट । रौतहटको सदरमुकाम चन्द्रनिगाहपुर-गौर सडकखण्डअन्तर्गत सुकदेव चौक र जयनगरको बीचमा बुधबार दिउँसो भएको दुर्घटनामा एकै परिवारका ७ जना घाइते भएका छन्।
चन्द्रनिगापुरबाट गौरतर्फ जाँदै गरेको प्रदेश–२–०३–००१ ह १०७४ नम्बरको ई-रिक्सा र विपरीत दिशाबाट आइरहेको बीआर ०६ जिजी ५४०४ नम्बरको पिकअप एकआपसमा ठोक्किदा दुर्घटना भएको हो।
दुर्घटनामा घाइते हुनेमा ई-रिक्सा चालक यमुनामाई-४ सरुअठाका ३४ वर्षीय जनसेद आलम दुवै हातखुट्टा तथा टाउकोमा गम्भीर चोट लागेर नेपाल तराई अस्पताल सुकदेवचोकमा उपचाररत रहेको जिल्ला प्रहरी कार्यालय रौतहटले जानकारी दिएको छ।
ई-रिक्सामा सवार सर्लाहीको बरहथवा-२ का नागेन्द्र बैठाको परिवार घाइते भएको प्रहरीले जनाएको छ।
उनकी श्रीमती २७ वर्षीया रिन्कु बैठाको टाउको तथा हातखुट्टामा चोट लागेर शिवदर्शन अस्पतालमा उपचाररत रहेकी छिन्।
उनकी छोरी ७ वर्षीया अनुश्का बैठा दुवै खुट्टा फ्र्याक्चर भई टाउकोमा चोट लागेर गम्भीर अवस्थामा रहेकी छन्। थप उपचारका लागि उनलाई वीरगन्ज पठाइएको छ।
अर्की छोरी ५ वर्षीया अन्निया बैठाको टाउकोमा चोट लागेर शिवदर्शन अस्पतालमै उपचाररत छिन्।
त्यसैगरी नागेन्द्र बैठाका छोरा ३ वर्षीय आयुष बैठाको टाउकोमा चोट लागेर अवस्था मध्यम रहेको र शिवदर्शन अस्पतालमा उपचार भइरहेको बताइएको छ। अर्का छोरा १८ महिनाका रोमन बैठाको समेत टाउकोमा चोट लागेर अवस्था मध्यम रहेको प्रहरीले जानकारी दिएको छ।
सोही ई-रिक्सामा रहेका माधवनरायण-सखुवबाका २० वर्षीय रामविश्वास बैठा पनि टाउकोमा चोट लागेर मध्यम अवस्थामा उपचाररत रहेको प्रहरीले जनाएको छ।
दुर्घटनापछि पिकअप चालक भारत, बिहार-सीतामढी, डुमरा-बडहरवाका ३१ वर्षीय सन्तोषकुमार साहलाई नियन्त्रणमा लिई आवश्यक कारबाहीका लागि इलाका प्रहरी कार्यालय गरुडातर्फ पठाइएको छ।
दुवै सवारीसाधन प्रहरीचौकी सुकदेवचोकले नियन्त्रणमा लिएर घटनाबारे थप अनुसन्धान जारी रहेको प्रहरीले जनाएको छ।
